पुणे : बहुचर्चित पानिपत या ऐतिहासिक चित्रपटासाठी पुण्यातील ‘पु. ना. गाडगीळ आणि सन्स’ने आठशेपेक्षा जास्त प्रकारचे दागिने घडवले आहेत. या चित्रपटाच्या कलाकारांनी नुकतीच पु. ना. गाडगीळ आणि सन्स यांच्या औंध येथील दालनाला भेट दिली. यामध्ये चित्रपटाचे दिग्दर्शक आशुतोष गोवारीकर, अभिनेता अर्जुन कपूर, कृति सेनन आणि सुनीता गोवारीकर यांचा समावेश होता.
या वेळी ‘पु. ना. गाडगीळ आणि सन्स’चे अध्यक्ष व संचालक अजित गाडगीळ, संचालिका डॉ. रेणू गाडगीळ, सीएफओ व विक्रीप्रमुख आदित्य मोडक, सतीश कुबेर व नंदू देवळे उपस्थित होते. या दागिन्यांचे प्रदर्शन औंध, हॅपी कॉलनी आणि सातारा रोड येथील दालनांमध्ये प्रदर्शन होत आहे.
‘पानिपत चित्रपटाचे दागिने हे ‘पु. ना. गाडगीळ आणि सन्स’शिवाय पूर्ण होऊ शकले नसते. चित्रपटात १२८ पात्रे आहेत. प्रत्येक पात्राचा अभ्यास करून त्याला साजेसे दागिने ‘पु. ना. गाडगीळ आणि सन्स’ने तयार केले. तसेच, शूटिंग चालू असताना संबंधित पात्राचे दागिने तयार नाहीत व दुसऱ्याचे दागिने तिसऱ्या पात्राला गेलेत, असे कधीही झाले नाही. यावरूनच ‘पु. ना. गाडगीळ आणि सन्स’ची तयारी लक्षात येते. पारंपरिक मराठा व पेशवाई शैलीचे उत्तम कलाकुसरीचे दागिने घडविण्याचा त्यांचा हातखंडा असल्याचे दिसून येते,’ असे गौरवोद्गार आशुतोष गोवारीकर यांनी काढले.
पु. ना. गाडगीळ आणि सन्सचे संचालक व अध्यक्ष अजित गाडगीळ म्हणाले, ‘चित्रपटाचे दागिने हे महाराष्ट्रीय शैलीबरोबरच उत्तरेकडील शैलीतील असून, दागिन्यांसाठी विशेष संशोधन केले आहे. हे दागिने विविध राज्यांतील आमच्या कारागीरांनी घडविले आहेत. सोन्याबरोबर कुंदन, मोती आणि विविध रंगांच्या स्टोन्सचा वापर दागिन्यांत आहे.’
‘पु. ना. गाडगीळ आणि सन्स’चे सीएफओ व विक्रीप्रमुख आदित्य मोडक म्हणाले, ‘चित्रपटासाठी आठशेहून अधिक विविध प्रकारचे दागिने घडविले असून, नेकलेस, बांगड्या, डोक्यातली फुले, अंगठ्या, कंबरपट्टे, कडे शिरपेच, वाक्या आदी दागिने आहेत. प्रदर्शनातील दागिन्यांवरून खरेदीसाठी ऑर्डरही देता येईल.’
विशेष प्रदर्शन
पानिपत चित्रपटात वापरण्यात आलेले पारंपरिक शैलीचे दागिने पाहण्याची संधी लोकांना मिळणार आहे. पु. ना. गाडगीळ आणि सन्सतर्फे पुण्यात औंध, हॅपी कॉलनी आणि सातारा रोड येथील दालनांसह नाशिक व सोलापूर येथेही हे प्रदर्शन होत आहे. पहिले प्रदर्शन औंधमधील पु. ना. गाडगीळ आणि सन्सच्या दालनात एक डिसेंबरपासून, तर हॅपी कॉलनी-कोथरूड येथे आठ डिसेंबरपर्यंत आणि सातारा रोड (वाळवेकरनगर) येथील दालनात चार ते २२ डिसेंबरदरम्यान होत आहे.